BBQ @ home

住左咁耐，第一次係屋企度BBQ

昨日終於係露台度進行左第一次BBQ
可惜地方太細，容納得四、五個人only

其實都幾搞笑，一個二個掛住睇電視，點知就個個都插晒炭
係屋企BBQ都幾好架，可以隨時搵到唔同工具出黎long住d 叉燒
岩晒d 懶鬼… 嘿嘿~~

不過都幾驚架，怕燻到個頂，搞到樓上個地台有事
燒完又怕個火熄唔晒燒著其他野，因為一淋水落去就會煙霧迷漫，灰塵滾滾

基本上都幾好玩架，尤其係岩晒我呢d 咁鍾意BBQ的人 🙂

 

濕地公園一日遊

昨日（十月二十二日）去濕地公園一日遊

十點幾去到，停車場已滿晒。睇怕下次去，要九點去泊車先得

未入場，已經有d 想走的感覺！因為好多人！好似去年宵咁…

沿路都係「遮海」。仲有，d 人真係好無公德！

寫明唔好叫囂唔好大聲講野，仍然仲係度大大聲講野！細o既已經衰，大o既一樣咁衰格！真係好乞人憎！

可能仲算「新」，環境仍然比較乾淨。觀鳥屋同米埔比較真係好乾淨。

好開心，可以見到好多唔同種類的雀鳥。仲有翠鳥！可惜太細隻，影唔到！>_<

論雀鳥，都係米埔多好多

論環境，就濕地公園比較乾淨

如果有得選擇，我都係比較喜歡米埔！可能因為唔係咁容易就去得，無咁多人啦！

 

世貿中心

睇左「世貿中心」
真係好正！
可能係我最愛的百老匯戲院
係塌樓果一幕，真係好似置身其中咁
個故事好感人。
好明顯，今次係拍故事，唔係拍特技

真係一套好片！值得去睇！

 

開心的婚禮

尋日參與左一個好開心的婚禮
一個識左接近十年的朋友
一個係教院認識的朋友
一個教我飲酒打牌的朋友 (哈哈哈~~)
結婚了

平時我認識的他，玩玩下，癲癲得得，無黎正經咁。
估唔到佢有一個拍左拖十幾年的女朋友。
最後亦都拉埋天窗。真係覺得好開心！

當日我有幸參與其中，充當一位司機
事關佢借左部車，但係又搵唔到人揸車
所以我自動請纓幫佢手。算係為老友做番d 野啦！

當日準時八點將部七人車開到佢屋企樓下，
佈置花車，影相，拍DV等。雖然中途落左一陣雨，
但亦無減大家的慶誌！

大約九點左右就出發去接新娘。
由於我的title係司機，所以我唔駛上樓，係樓下幫手睇住d 車。
係等的途中，有其中一個兄弟要早走，希望我可以順道車佢一轉，
但可惜我對附近路面唔太熟識，多似無車到佢。真係唔好意思！ >_<
等左一個鐘左右，新娘就落樓lu。

一眾姊妹就登我的七人車，出發回男家。
同樣地，我係樓下睇車，今次有VCD睇同埋可以睇電視(因為部車原來有TV tuner)
所以時間過得快好多… 又係大約一個鐘左右，又出發去酒樓食午飯

由於唔熟路，擾攘左一段時間先可以出發。真係超唔好意思！>_<
訂左三圍，去到已經有位，一坐抵就即刻劃點心，但可惜上菜好慢。:(

食完飯之後，就車番新娘同姊妹們回娘家。之後就自由活動一個鐘。
我泊底部車，就車度休息左一陣。約三點左右，就番娘家等候法落 :p

今次任務係先去土瓜灣接化妝師小組，再車新娘等人去酒樓，跟住返荃灣還車。
酒樓位於銅鑼灣利舞臺
人多車又車，塞左一輪車先去到利舞臺門口，放底新娘們之後就回荃灣了。
係回酒樓的途中，又收到指令要返娘家拎野，所以又要遊車河了…哈哈…

最後大約六點半左右就上到酒樓，而我亦都可以休息了。任務亦已完成！

坐係度等開席，睇住佢地真係好搞笑。播片啦，演講啦，播番當日朝早接新娘的片段…
由於佢地之間安排得好好，同埋酒樓都安排得好好！
全場都好順暢，好開心！d 片又好好笑，d 兄弟又搞笑又好玩！

亦因為太開心，又有一大班酒鬼一齊
所以我都飲左好多… >_<
最後差d 醉倒街頭，好彩同另外兩個老友一齊走咋… >_<

當日認識左好多人，好玩得的人！有新娘的細佬(成日唔記得叫乜名 >_<)，佢陪左我好多時間
因為得全日得佢同我係負責揸車。新郎果班兄弟，親兄弟等…全部都好正！

最後祝黃永泰伉儷，永結同心，白頭到老，三年抱兩。

 

不停收「炸彈」

已經四封了！

第一封，因有要事，未能出席，真係唔好意思！
第二封，被委以重任，為當日大會攝影師。真係責任重大！好緊張！
第三封，老友聚妻，因未能找到司機，所以我黎負責，但係七人車，又好緊張！
第四封，同事結婚，唔駛緊張！嘿~~

黎緊真係陸續有來！真係想大叫一句，搶錢呀~~

而家最重要係，準備黎緊星期六（十月七日）幫佢地影番輯靚相
因為未試過影呢d 相，好緊張好緊張
已經問朋友借左好多器材，自己亦為今次添置左d 器材，希望做到最好！